Back to Miir :)

Color Record No. 53, Side A:

and another Miir Ghazal  J

aaNkhoN meN jii miraa hai idhar yaar dekhnaa

‘aashiq ka apne aaKhirii diidaar dekhnaa

kaisaa chaman kih ham se asiiroN ko man’a hai

chaak-e qafas se baaGh ki diivaar dekhnaa

aaNkheN churaaiyo nah Tuk abr-e bahaar se

merii taraf bhi diidah-e KhuuN baar dekhnaa

ai ham safar nah aabile ko pahuNche chashm-e tar

laagaa hai mere paa’oN meN aa Khaar dekhnaa

honaa nah chaar chashm dil us zulm peshah se

hushyaar ziinhaar Khabar daar dekhnaa

sayyaad dil hai daaGh-e judaa’ii se rashk-e baaGh

tujh ko bhi ho nasiib yih gul zaar dekhnaa

gar zamzamah yihii hai ko’ii din to ham safiir

is fasl hii meN ham ko giriftaar dekhnaa

bulbul hamaare gul pah nah gustaaKh kar nazar

ho jaa’e gaa gale ka kahiiN haar dekhnaa

shaayad hamaari Khaak se kuchh ho bhi ai nasiim
Ghirbaal kar ke kuuchah-e dil daar dekhnaa

us Khvush nigah ke ‘ishq se parhez kiijo :Miir:

jaataa hei le ke jii hi yih aazaar dekhnaa