Minnelieder

Mein Lieblingsdichter ist Walther von der Vogelweide (wer des vergaess', der taet' mir leide) ... da ich jetzt doch richtig angekommen bin und die Zeit habe, mehr als 2 Verse zu tippen, wollte ich heute ein beruehmtes Gedicht von ihm posten  :)
________________________________________

Under der linden

Von Walther von der Vogelweide

     

     Under der linden

an der heide,

dâ unser zweier bette was,

dâ mugent ir vinden

schône beide

gebrochen bluomen unde gras.

vor dem walde in einem tal,

tandaradei,

     schône sanc diu nahtegal.

     Ich kam gegangen

zuo der ouwe:

dô was mîn friedel komen ê.

dâ wart ich enpfangen

hêre frouwe,

daz ich bin sælic iemer mê.

kuster mich? wol tûsentstunt:

tandaradei,

     seht wie rôt mir ist der munt.

     Dô hete er gemachet

alsô rîche

von bluomen eine bettestat.

des wirt noch gelachet

inneclîche,

kumt iemen an daz selbe pfat.

bî den rôsen er wol mac,

tandaradei,

      merken wâ mirz houbet lac.

      Daz er bî mir læge,

wesse ez iemen

(nu enwelle got!), sô schamte ich mich.

wes er mit mir pflæge,

niemer niemen

bevinde daz, wan er unt ich,

und ein kleinez vogellîn:

tandaradei,

     daz mac wol getriuwe sîn.